- Arkeologi må tilpassa tilbodet etter ressursane

- Arkeologi må tilpassa undervisningstilbodet sitt etter kor mange ressursar faget har. Er det for få lærarressursar til å handtera dagens opplegg, må det vurderast om opplegget må endrast, om evalueringsformene må gjerast mindre kostnadskrevjande og om timetalet på kvart emne må reduserast. Det seier instituttleiar Jorunn Bjørgum ved Institutt for arkeologi, konservering og historie (IAKH).

Det var i Uniforum og Universitas denne veka at programleiar og professor Christopher Prescott gjekk hardt ut mot både institutt- og fakultetsleiing og kravde inntaksstopp av nye studentar på arkeologi.

Han viste til at ressursmangel og eit svært undervisningsoverskott, ville føra til ei dårlegare oppfylging av dagens studentar, dersom dei nye studentane også skulle få tilbod om vanleg undervisning.

Studiedekan Gro Bjørnerud Mo har etter samtalar med instituttleiinga gjort det klart at arkeologi får den same studentkvota som tidlegare, også for våren og hausten 2008.

- Må bruka timelærarar

Instituttleiar Jorunn Bjørgum synest arkeologi no bør setja tæring etter næring.

- Dei har i 2007 hatt ein tilsett i ein mellombels 80 prosent stilling som universitetslektor og denne ordninga blir ført vidare i 2008. Det skuldast at ein av lærarane, professor Dagfinn Skre, er kjøpt heilt fri for å førebu eit stort utgravingsprosjekt på Avaldsnes på Karmøy, der Noregs første kongsgard låg.

- For dei vitskaplege tilsette som er programleiarar, har andre verv eller har forskingstermin og liknande, blir det stilte midlar til rådvelde frå fakultetet eller instituttet slik at ein kan bruka pengane på timelærarar.

-Den undervisninga som ikkje kan utførast av det faste vitskaplege personalet, må arkeologi bruka timelærarar til for å få kabalen til å gå opp. Det er sett av 600 000 kroner til det, og det blir det ein del timar ut av. Historie brukar i utstrekt grad time- og hjelpelærarar til å undervisa på lågare grad, og det kan også arkeologi gjera, synest Bjørgum som vil handsama alle faga likt.

Får forskingsbasert undervisning

Ho trur heller ikkje undervisninga blir mindre forskingsbasert, sjølv om den blir gjort av time- og hjelpelærarar.

- Nyutdanna kandidatar har gjennom arbeidet med hovudoppgåva eller masteroppgåva sjølve både drive forsking og har hatt nær kontakt med forskingsmiljøet. Som eventuelle time- og hjelpelærarar vil dei jo halda fram med det og kan heile tida ha god kontakt med fagmiljøet og få gode råd frå det faste vitskaplege personalet, konstaterer instituttleiaren på IAKH.

- Men for å rettleia masterstudentar krev me sjølvsagt at ein timelærar må ha doktorgrad, legg ho til.

- Kva meiner du er hovudårsaka til at arkeologi har hamna i denne situasjonen?

- Dei har kort og godt ikkje tilpassa studiet til tilgjengelege ressursar. Det er grunnen til at dei også har eit stort undervisningsoverskot, sjølv om talet som verserer på 6500 timar ikkje er kvalitetssikra, seier Bjørgum, som også understrekar at ein del av det store overskotet skuldast innspurten på det gamle hovudfaget våren 2007.

- Ekstraordinær situasjon

- Det var ein ekstraordinær situasjon som gjorde at lærarane fekk ekstra mange rettleiaroppgåver og sensurarbeid i tillegg til dei ordinære masteroppgåvene. Resultatet blei ei kjempestor arbeidsbør. Det er grunnen til at instituttleiinga vil vurdera å betala noko av dette overskotet i form av honorar til dei aktuelle personane, seier ho.

Det kjem likevel ikkje på tale å innføra inntaksstopp på arkeologistudiet.

- Nei, det vil det ikkje bli. I eit møte som eg hadde med programleiar Christopher Prescott, undervisningskoordinator Ingrid Fuglestvedt og undervisningsleiar Rasmus Brandt i førre veke, tok dei to sistnemnde på seg oppgåva med å utarbeida ein undervisningsplan for 2008 i samsvar med dei tilgjengelege ressursane. Difor kom det bardus på meg, då Prescott sende brev til fakultetet og kravde inntaksstopp av nye studentar på arkeologi, fortel ho.

- Vanleg å overbooka studenttalet

Instituttleiaren er heller ikkje samd i kritikken frå studentane om at det blei tatt opp for mange studentar på bachelorstudiet.

- Me har 50 plassar og sende ut tilbod til 85 søkjarar. 61 takka ja og berre 57 av dei møtte ved semesterstart. Det er heilt vanleg på alle fag å overbooka talet på studentar, fordi røynsla viser at nokre av dei vil trekkja seg frå studieplassen sin, peikar ho på.

Det er heller ikkje snakk om å inndra stillingar på arkeologi som blir ledige fordi folk går av med pensjon.

- Me har nettopp utlyst ei førefinansiert stilling som førsteamanuensis i arkeologi for å ha ein person klar som kan overta når ein av dei vitskaplege tilsett går av for aldersgrensa, seier Bjørgum.