Spesielt talentfulle elevar i 10. klasse på ungdomstrinnet har gjennom Kunnskapsløftet fått tilbod om å ta matematikkpensumet til 1. klasse i den vidaregåande skulen.
No har Universitetet i Oslo lagt til rette for at desse elevane kan ta universitetskurs i matematikk frå dei begynner i 3. klasse i den vidaregåande skulen. Dei 37 elevane hadde den første timen med matematikk på universitetsnivå på Blindern sist onsdag. Det er begynnarkurset MAT 1100 elevane får tilbod om.
– Dette kurset er matematikkgrunnlaget for dei som seinare vil studera matematikk, fysikk, kjemi, astronomi eller informatikk, opplyser tilretteleggjar og universitetslektor Nils Voje Johansen ved Matematisk institutt til Uniforum.
– Logisk
Skuleelev Cathrine Lowzow frå Oslo katedralskole elskar matematikk:
– Eg synest matematikk er gøy og utfordrande, og ikkje minst logisk. Samtidig finst det alltid ein fasit klar, konstaterer ho. Også Xiang-Kun Kong frå sameskule er glad i matematikk.
– Det er like greitt å ta eit universitetskurs i matematikk no i staden for å venta med det til seinare. Matematikk er berre gøy, synest han.
Må ha karakteren 5
Kravet for å koma inn på kurset er at eleven har karakteren 5 eller betre i matematikk. Elevane skal ha endeleg eksamen i april neste år.
Kurset går kvar onsdag mellom klokka 17 og 20 og kurset blir halde av Inger Christin Borge. Matematisk institutt opplyser at Universitetet i Oslo under utviklinga av undervisningsopplegget har hatt eit godt samarbeid med Utdanningsetaten i Oslo og Avdeling for vidaregåande opplæring i Akershus fylkeskommune.
Desse vidaregåande skulane gir elevane tilbod om universitetskurs i matematikk:
Akershus
Asker vgs
Jessheim vgs
Mailand vgs
Nadderud vgs
Nes vgs
Nesbru vgs
Stabekk vgs
Valler vgs
Oslo
Fagerborg vgs
Foss vgs
Oslo handelsgym
Oslo katedralskole
Kristelig gymnasium
Nydalen vgs
Ullern vgs
Ulsrud vgs
Logg inn for å kommentere
Ikkje UiO- eller Feide-brukar?
Opprett ein WebID-brukar for å kommentere