Ingen utfordrar sitjande dekanar under valet på SV og JUR i haust

Det var i vår jussdekan Ragnhild Hennum stod fram i Uniforum og proklamerte at ho gjerne ville ta fire nye år som dekan ved Det juridiske fakultetet. Samtidig etterlyste ho ein utfordrar under dekanvalet i oktober.

– Eg håpar å få ein motkandidat. Det er viktig for universitetsdemokratiet at me har reelle val, sa ho til Uniforum.

SV-dekan Anne Julie Semb bestemte seg først i slutten av juni. Då kunngjorde ho på SVs nettsider at ho hadde bestemt seg for å ta ein ny periode som dekan.

– Jeg har hatt stor glede av å lede fakultetet gjennom fire tidvis krevende år, og er motivert for en ny periode. Så håper jeg at vi får et reelt valg, og at valgkomiteen finner andre kandidater som også er motivert for dette arbeidet, sa dekan Anne Julie Semb.

Så langt har likevel ingen utfordrar meldt seg, får Uniforum opplyst hos leiaren for valkomiteen Grethe Brochmann. Fristen går ikkje ut før den 13. oktober.

På Det juridiske fakultetet var den opprinnelege fristen for å melda seg som dekankandidat den 1. september. Den fristen er no forlengja fram til fredag 15. september, opplyser kommunikasjonsleiar Steinar Hafto Myre til Uniforum.

Då Ragnhild Hennum blei vald til dekan for første gong i 2019, blei ho utfordra av professor ved Nordisk institutt for sjørett Trine Lise Wilhelmsen. Valet vann ho overlegent med 76,6 prosent av stemmene. Det var første gong det var to kandidatar ved eit dekanval på Det juridiske fakultetet.

Ved SV-fakultetet har det så langt aldri vore fleire enn ein kandidat under dekanvalet. Der har tradisjonen vore at valkomiteen plukkar ut og intervjuar folk, og til slutt finn fram til ein kandidat som seier seg villig.

Uansett om det blir ein eller fleire dekankandidatar på Det juridiske fakultetet, skal det haldast eit valmøte den 25.september. Då kan dekankandidaten eller kandidatane presentera laget sitt og valprogrammet for dei komande fire åra. Valet skal vera avslutta den 12. oktober og resultatet skal kunngjerast den 13. oktober.

Om det ikkje blir eit reelt val, vil fakultetsstyret formelt velja dekan. Slik det ser ut no, vil dekan Ragnhild Hennum bli attvald.. Dekanteamet hennar er fornya, og får no med seg Maria Astrup Hjort som studiedekan og Geir Stenseth som forskingsdekan. Så lenge det ikkje er nokon motkandidat, ser det ut til å bli dekanatet for dei neste fire åra.

SV-dekan Anne Julie Semb stiller til val saman med forskingsleiar ved Psykologisk institutt Lars Tjelta Westlye og professor ved Institutt for statsvitskap Tora Skodvin. Dekanvalet går føre seg frå 6. til 10. november, og den som blir vald som dekan, tar til rett etter nyttår. Og om det blir berre ein kandidat, er det fakultetsstyret som formelt vel dekanen.

• Les meir om dekanval på Det juridiske fakultetet: 

Valgresultatet er klart: Ragnhild Hennum blir første kvinnelige jussdekan på UiO

Dekanvalg på Jus: Reformkandidaten Ragnhild Hennum vil ha moderne pedagogiske metoder

Valgdebatt på Det juridiske fakultet: Skarpe motsetninger i dekankampen

• Les meir om dekanval på Det samfunnsvitskaplege fakultetet: 

Anne Julie Semb er trolig SVs neste dekan

Derfor stiller ikke Nils-Henrik von der Fehr til gjenvalg

Fanny Duckert: Dekanvalg med én kandidat er der verste av begge løsninger