Dei har fått UiO:Demokratis første studentstipend

Frå byrom på Grønland til lokaldemokrati i Drammen og demokratiutdanning i grunnskulen. Det er spennvidda i masteroppgåvene som er blitt lønna med stipend frå UiO:Demokrati.

FEKK STIPEND: Dei fekk tildelt stipend frå UiO:Demkrati. Frå venstre Madeleine Muldbakken, Charlie Dina Dickhausen, Janne Krogh-Bjørnerud og Elizabeth Beech.

Foto: Martin Toft

Fire masterstudentar fekk torsdag 2. november utdelt tre stipend på 20 000 kroner kvar frå UiO:Demokrati. Formålet med stipenda er å lønna særskilt gode, demokratirelevante prosjekt.

Prisvinnarane Janne Krogh-Bjørnerud frå Det humanistiske fakultetet, Elizabeth Beech frå Det utdanningsvitskaplege fakultetet og Charlie Dickhausen og Madeleine Muldbakken frå Det samfunnsvitskaplege fakultetet blei heidra under ein felles lunsj hos UiO:Demokrati på HF. Oppgåvene dei skal skriva handlar om alt frå byrom på Grønland til lokaldemokrati i Drammen og til demokratiutdanning i grunnskulen i Oslo.

Brukar pengane på informantane

Medan Charlie Dina Dickhausen og Madeleine Muldbakken skriv ei felles masteroppgåve, skal Janne Krogh-Bjørnerud og Elizabeth Beech laga kvar sine masteroppgåver.

Og dei fire studentane veit alle kva dei skal bruka pengane til.

– Me skal nytta dei overfor informantane våre, anten til lunsj eller for å gi dei litt kompensasjon for at dei stiller opp for oss, og tar av tida si, var alle einige om.

– Imponert

Direktør Tore Rem i UiO:Demokrati gav masse skryt til dei fire masterstudentane: - De er flinke, og me får heilt sikkert høyra mykje meir om og frå dykk i åra som kjem, sa han.

Rem tykte også at studentane gav eit godt inntrykk på andre måtar.

– Og eg var imponert over at dei var så interesserte i prosjekta til kvarandre, understreka han overfor Uniforum.

Alle dei fire masterstudentane skal ha klar masteroppgåvene sine i mai neste år. Til saman var det 17 søkjarar til masterstipenda, opplyser sekretariatet til UiO:Demokrati.

Prosjekta som er tildelte stipend er:

Janne Krogh-Bjørnerud (HF) ”Deliberativt lokaldemokrati og retorisk medborgerskap i Drammen kommune”. Retorikkstudenten ser på ulike kommunedelar i storkommunen Drammen og i kva grad dette legg til rette for demokratisk drøfting av alle sider i ei sak og retorisk medborgarskap.

Charlie Dina Dickhausen og Madeleine Muldbakken (SUM/SV) ”Byrom i endring”. Dei to psykologistudentane ser på innbyggjarane si oppleving av og meiningsskapinga rundt byutviklinga i delbydelen Grønland i Gamle Oslo. Dei har fokusert særleg på korleis og kor vidt delbydelen vert opplevd inkluderende og om byutviklinga vert forstått som rettferdig.
Elizabeth Beech ”Bridging the Gap.” (UV). I oppgåva ser pedagogikkstudenten på korleis lærarar i Oslo underviser i og om demokrati før og etter at dei har tatt med elevane på besøk til Senteret for studiar av Holocaust og livssynsminoritetar, og om undervisninga bidrar til å utvikla elevane sin demokratiske kompetanse