Helseministeren og ordføraren tok det første spadetaket for nytt Rikshospital

Det nye Rikshospitalet som skal stå ferdig i 2031, gir Oslos innbyggjarar grunn til å sjå lyst på  framtida, ifølge helseminister Jan Christian Vestre (Ap) . I dag var han med på den symbolske markeringa av byggjestarten til milliardutbygginga på Gaustad.  

– Dette er ein stor dag. Me er i ei omveltande tid for vår kjære hovudstad, og då meiner eg i positiv forstand. Oslo universitetssykehus har dessverre nokre av dei dårlegaste bygga i landet, men no blir det ei endring. For etter årevis med prosjektering, planlegging og ulike  tidshorisontar, så går me no frå prosjektering til gjennomføring takka vera iherdig innsats frå utruleg mange flinke menneske.

– No vil me no etter kvart sjå dei nye flotte bygga reisa seg. Det synest eg me skal ta ein applaus for, sa Jan Christian Vestre, og han fekk umiddelbart god respons.

Let seg ikkje forstyrra av demonstrantane

Ikkje alle var like begeistra som statsråden. I bakgrunnen kunne dei frammøtte også  høyra protestropa frå nokre av dei som aksjonerer mot nedlegging av Ullevål sykehus og mot  bygging av nytt Rikshospital.  Men dei blei i starten overdøyvde av Hans Majestet Kongens Gardes musikkorps som opna heile seremonien. 

Helse- og omsorgsminister Vestre let seg imidlertid ikkje forstyrra av demonstrantane. Han kom med ein hyllest til det norske helsevesenet. 

– Gode venner, for at vår felles kjære helseteneste skal vera berekraftig, ikkje berre for vår generasjon, men også for neste generasjonar av pasientar, og ikkje minst for det fantastiske helsepersonellet me er så heldige å ha i Noreg, så må me tenkja langsiktig, var han overtydd om. Derfor trekte han fram kor viktig det var med nye bygg og ny infrastruktur.  

– Me må greia å rekruttera, å behalda og å utvikla både helsepersonellet vårt og infrastrukturen vår gjennom moderne bygg og tungt medisinsk utstyr som gjer at me kan yta den beste hjelpa, understreka han. 

Vestre omtalte  den symbolske byggestarten av det nye Rikshospitalet som ei svært viktig hending. 

– Dette er det siste viktige leddet i det som blir ei stortstilt, fenomenal utbygging ved Oslo universitetssykehus. Det er ei utbygging som skal gi betre helsetenester for folk i Oslo og for regionen. Men dette er også eit prosjekt som har nasjonale dimensjonar, slo han fast.

– Set hovudstaden på kartet i heile verda

Jan Christian Vestre peika også på personlege erfaringar med helsetenesta i Oslo.

– Storbylegevakten er i drift. Eg har vore der, både på besøk som helseminister og då eg trengte hjelp. Det er eit fantastisk prosjekt og eit levande døme på ein moderne, offentleg, framoverlent helseteneste.

Det vert bygd på nye Aker, Ila og på Radiumhospitalet. Og rett nedanfor her vert det bygd eit nytt strålande livsvitskapsbygg saman med framifrå, verdsleiande kompetanse- og forskingsmiljø på Universitetet i Oslo. Denne samlinga av viktige laboratorium og forskingsmiljø som no skjer, blir ein markant milepæl  i samarbeidet mellom universitetet og sjukehuset. Det set ikkje hovudstaden vår berre på kartet i Noreg, men i heile verda, var Jan Christian Vestre overtydd om.

– Ein skikkeleg festdag

Oslo-ordførar og lege Anne Lindboe (H) var ikkje mindre overstrøymande enn helseministeren over at bygginga av nytt Rikshospital no er sparka i gang. 

– Dette er ein skikkeleg festdag for alle oss som bur i Oslo. For endeleg er me i gang med bygginga av det nye rikshospitalet - eit fantastisk sjukehus med topp kvalitet for landet og ikkje minst for alle oss som bur i Oslo, var opningsorda til ordføraren. 

Også ho kom inn på eigne erfaringar med Rikshospitalet. 

– Som medisinarstudent sat eg her då dei begynte å  byggja på dagens rikshospital. Eg hugsar korleis me skvatt til på auditoriebenkane kvar gong det blei sprengt noko.. Endå meir hugsar eg stoltheita av å få lov til å ta på seg legefrakken og gå inn her på jobb då sjukehuset stod ferdig. Ikkje minst hugsar eg kor fantastisk det var for pasientane og kor glade dei var for å få desse flotte og moderne bygga. Sånn kjem det til å bli når fase 2 er ferdig, var ho heilt sikker på. 

– Gir på litt ekstra gass

OUS-direktør Bjørn  Atle Lein Bjørnbeth var også ein glad mann under markeringa. 

– Dette er ein stor dag for sjukehuset, og det er ein stor dag for AS Noreg. Me har på mange måtar verdas beste spesialisthelseteneste. Det er ein så viktig kvalitet ved å bu i Noreg at me har den helsetenesta me har, og det skulesystemet me har. Derfor er det viktig at me som er her, og alle andre som me jobbar saman med, tar det innover seg og gir på litt ekstra gass, slik at me skal greia å føra vidare akkurat det, sa Bjørnbeth.

Han kom også inn på kor lang tid det tar frå ein plantar ideen om eit slikt prosjekt til det blir realisert,

– Det tar 25 år. Så me har "roughly"  åtte  gode år igjen før me er i mål med dette prosjektet konstaterte han.

Bjørnbeth trekte fram det gode samarbeidet med Oslo kommune om Storbylegevakten  Og så la han heller ikkje skjul på at byggjeprosjektet ville bli krevjande. 

– Me jobbar intenst heile tida for å redusera risiko. Og me kjem til å ha mykje kontakt, hyppige møte på alle tider av døgeret for å sørgja for at dette skal gå bra. Dette skal me få til, det er eg heilt sikker på, lova han.

Sette pris på motstand

Bjørnbeth takk alle dei som hadde bidratt til prosjektet, men var også glad for at det hadde vore motstridande synspunkt om prosjektet.

– Ved motstand mot slike prosjekt og at det er mange ulike instansar som har synspunkt på prosjektet, det er ting som bidrar til det som eg starta med  å seia: Dette er eit fantastisk land å bu i, og då må me leva med akkurat dette. Det er ein verdifull ting at alle synspunkta kjem fram og at me får gjennomført dei gode prosjekta, som dette er eit døme på, likevel, slo Bjørnbeth fast. 

Om alt går etter planen, vil nytt Rikshospital altså stå ferdig i 2031.