UiO vil skaffa ny ekstern finansiering til Norsk senter for molekylærmedisin

Det var i oktober i fjor Uniforum kunne melda at frå budsjettåret 2025 trekkjer både Forskingsrådet og Helse Sør-Aust den økonomiske støtta til Norsk senter for molekylærmedisin (NCMM).

Då sette Universitetsstyret ned ei arbeidsgruppe som skulle føreslå korleis senteret likevel skal kunna drivast vidare på UiOs budsjett. 

I  april i år hadde arbeidsgruppa klar ein rapport som blir lagt fram som ei informasjonssak til Universitetsstyret i dag. I mai blei UiO-styret også orientert om den framtidige rolla senteret skal ha i den faglege utviklinga innanfor livsvitskap i Livsvitskapsbygget. Ifylgje saksdokumenta skal senteret utføra vitskapleg forsking på høgt internasjonalt nivå, utvikla forskartalent og gi tilgang til viktige kjernefasilitetar.

UiO må koma fram til andre løysingar

Fram til no har UiO stått for mesteparten av finansieringa av senteret. Det skjer gjennom ein kombinasjon av 26,5 millionar i varig tildeling og 8,5 millionar kroner i mellombelse satsingsmidlar. Sidan den eksterne pengestraumen frå Noregs forskingsråd og Helse Sør-Aust tar slutt i løpet av året, må UiO koma fram til andre løysingar for å få inn eksterne midlar i framtida.  Det var grunnen til at det blei oppretta ei arbeidsgruppe som skulle koma med forslag til kva som kunne gjerast for å få til eit vidareutvikla senter. 

Høge mål for forskingssenteret

I første omgang vert Universitetsstyret no bede om å omprioritera satsingsmidlane på 8,5 millionar kroner. Men dette skal gjerast over tid.

 I rapporten frå arbeidsgruppa går det fram at måla med senteret framleis er høge. Det skal halda fram med å vera med i det europeiske forskingssamarbeidet om molekylærmedisin (EMBL) og vera ei av satsingane i Livsvitskapsbygget. Den faglege profilen for det framtidige senteret skal byggjast på innovativ forsking, utvikling av nye teknologiar og vektlegging av fagleg samarbeid. Det skal forskast  på alt frå intrikate cellulære mekanismar i biologi og biomedisin til område som handlar om både menneska si helse og økosystem. Ambisjonen er også å styrkja samarbeidet mellom gruppeleiarane på senteret og dei andre fagmiljøa i livsvitskap på UiO, går det fram av sakspapira som no ligg på Universitetsstyrets bord.

Vil skje ei nedskalering av senteret

Der står det også at Norsk senter for molekylærmedisin vil vera ein svært viktig aktør i det nye Livsvitskapsbygget og at universitetsleiinga framleis vil jobba med å skaffa ny ekstern finansiering til satsinga.  Samtidig vert det opplyst at det vil skje ei nedskalering av senteret.  Det skal opp til drøfting på UiO, og derfor vil universitetsdirektør Arne Benjaminsen koma tilbake til styret med ei vedtakssak om akkurat det spørsmålet, vert det peika på i sakspapira.

Når Livsvitskapsbygningen opnar dørene i 2027, er det meininga at heile organisasjonen til Norsk senter for molekylærmedisin skal flytta inn der. I dag er mesteparten av senteret lokalisert i Forskingsparken, medan ein mindre del held til i Kristine Bonnevies hus på Blindern. 

• Les meir om Norsk senter for molekylærmedisin:

UiO set i gang redningsaksjon for Norsk  senter for molekylærmedisin

Ombygging i Forskningsparken fører til spittelse av toppforskingssenter

Asbestfunn gjorde at forskargruppe måtte ut av nyinnflytta lokale

Molekylærmedisinsk senter får toppkarakter i evaluering

Fra forskningsresultat til medisinsk behandling